كلمات وألوان

شعر

شعر

أدركت

أنها  بداية إحتضار

الغد في أمسي

 

لوحة الفنان لعرارسي امحمد

اللسان (قصيدة زجل)

لوحة للفنان و زجال  لعرارسي امحمد

اللسان  (قصيدة زجل)

اللسٌان درٌازْ الكلمة

ينسَجْها

يختَارْ لونها

ويخلق شْكَلْها

يزوق إِنَمٌقْ

مرٌة شتيمة

ومرٌة حكمة

يْلُوكْ النٌعْمَة

إصِيغ الْمَا

و يَنسجْ الكَلْمة

مرة كافر

مرة شاكر للنٌعْمَة

مرٌة بصير

مرةاعْمَى

يرفعْ مَوْلاَه

ولاٌ يرْميه من السْمَا

اللسٌان درٌازْ الكلمة

إرَكٌبْ  احْرُوفْ

إجَمٌدْ بِهَا الْمَا

يْدَمْ

يَبْني يهدم

يزرع الحب

ينشر الكراهية

يدَسْ السم

طرف من لْحَمْ

مرة احْدَجْ

مرٌة عْسَل

اللسٌان درٌازْ الكلمة

ينسج حروفها

إدَوٌزْ طُعْمَتْها

في اسْدَاها

بكلمة يَوْصَلْ

بأُخرَى يَحْصَل

يَمْحِي خْلاَيَقْ

بْزِيفْ القَوْل

يْرَدْ الباطل معقول

دَرٌازْ واشْ مَنْ دَرٌازْ

يْرَجٌعْ ارْخَاصْ اعْزَازْ

يَاكُلْ لْحم حي وميت

اللسان دَرٌاز الكلمة

ينسج لحروف

إوَزٌعْ الرحمة

يَزْرَعْ الخوف

سَرٌُ مَكْشوفْ 

بْرَسْم لحروف

على نْسيجْ الكلمة

إوَلٌدْ اليأس

يخلق الأمل

يذكر

يشكر

يَخْوِي

يْعَمٌرْ

يعترف ينكر

اللسان فنان

في كل ازمان ومْكان

هو بطاقة تعريف

دْوَاخََلْ الإنسان

أما الصورة

من البَعْدْ اتْبانْ

يْخَرٌجْ مكنون الصورة

يرْسَمْها بالحروفْ

على نْسيجْ الكلمة

عَنْدُو تَعْبِيرْ

مَتْحَرٌكْ وْلاَ سَاكَنْ

لََوْنُ

بِينْ احْمَرْ فَاتَحْ وْ دَاكَنْ

دَرٌازْ عِيسَاوي

يَجْرَحْ  وِ يْدَاوِي

يَتْحَرٌكْ

تَعْرَفْ

مَوْلاَهْ آشْ يْسَاوي

يْخَرٌجْ  لَكْحَلْ مَنْ لَبْيَضْ

يَفْتَحْ يْسَدْ

اللسان مَفْتاحْ الإنسان

يَاأبْوابَْ الجنة

يا أبْوابْ النيران

اللسان دَرٌازْ الكلمة

يَفْضَحْ يَنْصَحْ

يَبْهَمْ يَفْصَحْ

يْرَجٌعْ لَكْدوبْ صَحْ

فيه لَخْطيبْ

فيه الذيب

به إجيكْ لعدو

في صورة لحبيب

اشْحالْ خْوَا

وَشْحالْ عَمٌرْ  مَنْ  جِيبْ

اللسان دَرٌازْ الكلمة

إرَجٌعْ النور ظلمة

اللسان فْ الذات

لحمة اصْغيرَه

تخلق أهوالْ كْثيرَه

تْحَسٌنْ وْلاَ تخَيٌبْ السيرة

اللسان دراز الكلمة

ينسج أفكاروْ أشْعَارْ

إوَحٌدْ إفَرٌقْ

يْكَثٌرْ وْلاَ يْقَلٌلْ الرزق

يْواجَهْ يْنَافَقْ

يْغَرٌقْ يَعْتَقْ

يَجْمَعْ وِ يْفَرٌقْ

بِاللٍسَانْ

عْلَى سَيَرْ لَخْلاَيَقْ

تْمَيٌزْ الإنسانْ

الحال(قصيدة زجل)

tableaux de ararsi mhamed

سَوَلْت حَالي مَال حَالو

كالٌي معرفتو مالو     (الكاف تلزمه ثلاث نقط من فوقه)

رْجَعت لنفسي

تكشف اسرارو

 لْقيتها ما فاهمة والو

بقيت حاير

فراسي وماجرى لو

اش يمكن لي نعرف

في حال واحد

حقو ماشي ديالو

ولي ورداتو قبل ما يفتحُْ

ذبالو

ولي ماتت حقيقة

وبقا غير خيالو

إدافع عل قناع

ماشي ديالو

الحال غير حال

واش الحال يغير حالُو

لي ماعجبو حالو

يعرفها فعالو

ولي خاض لبحر

ما يتخلع من اهوالُ

فيق يا راسي

راه انت اسباب

كل مانقاسي

انت لي مقلل انعاسي

انت لي مشرفني

اقبل الوقت

ما نقدر على حمص

وخا بضراسي

خصك تعرف اراسي

راه الفاس فاس

وبلا هراوة

ما يحفر السٌاس

والبرمة برمة

لكن ماتفور بلا كسكاس

ولَمْسَنْ فالجامع تيمومة

وفالزنقة تزطم عليه الناس

غريتيني واشْرَدْت

نسحابك تقدمت

بعدما تعلمت

وفضحك الحال

ولقيتك تْعَوْلَمْت

ونسحابك فهمت

الساعة انت غير قلدت

 ولي قلد بلا ما يفهم

فحال لي صلى

وكساتو مطلية بالدم

ياراسي

يا صحيبي

يا أنا

ما يلقى راحتو

لي اتبع الكانة            (الكاف تلزمه ثلاث نقط من فوقه)

ولمريض بالوسواس

ما يعرف الهنا

ولي يزرع الخير

ما يلقى محنة

وقبل مانشوفو

لاَخْرين شكون هما

اجى يراسي

انْكلسو للارض            (الكاف تلزمه ثلاث نقط من فوقه)

وانشوفو راسنا

اشكون احنا ؟